Portal:nap

'O Nnapulitano è na lengua cu na longa tradizione scritta, ca accummencia ô seculo XV e arriva fino a mmo. E allora? Pecché nun 'o sapimmo cchiú scrivere? 'O probblema è ca chi ha studiato â scola mo vô scrivere 'o napulitano cu 'e rreole d' 'o ttaliano! Chesta è 'a stessa cosa e uno ca vulesse scrivere 'o franzese cu 'e rreole d' 'o ttaliano, assurdo, no? Epperò ce sta chi penza accussí. E allora s'arriva 'a vedé nu napulitano ca scrive "kitemmuort" quanno avess' 'a scrivere "chi te muorto". 'O probblema è ca chella "o" finale penza ca s'ha dda pronunzià comme 'int'ô ttaliano! E pecché? Mistero... Quase comme 'o Nnapulitano fosse na lengua d' 'o Borneo ca nun s'è scritta maje primm' 'e mo! E allora si ce piace overo 'a lengua nosta, facimmo nu sforzo e scurdammoce comme se scrive 'o ttaliano quanno vulimmo scrivere nnapulitano, vabbuò? Ccà ausammo 'e reole d' 'o napuletano comme s'ausava na vota (e comme s'avess' 'a ausà pure mo). Quanno se scrive 'o napuletano ccà ausammo 'e parole ca na vota erano 'a lengua commune a tuttuquante, e quanno è necessario l'adattammo ô napuletano 'e ogge. Ce stanno pure parole ca nun ce stevano na vota e pe ccheste s'ausano parole ca vengono "prestate" 'a ati llengue (pure d' 'o ttaliano, chiaro).